आजरा: “नव्या घराची स्वप्ने अपुरीच”, अपघातात चौघांचा दुर्दैवी अंत | Mummewadi Ghat Accident

कोल्हापूर : निपाणी–आजरा मार्गावरील मुम्मेवाडी घाटात (Mummewadi Ghat Accident) झालेल्या भीषण अपघातात होन्याळी (ता. आजरा) येथील चांदे कुटुंबातील चौघांचा दुर्दैवी मृत्यू झाल्याने संपूर्ण गावासह नातेवाईकांवर शोककळा पसरली आहे. उन्हाळी सुट्टी आनंदात घालवण्यासाठी मुंबईहून गावी आलेल्या या कुटुंबाचा एका क्षणात अंत झाल्याने परिसरात हळहळ व्यक्त होत आहे. विशेष म्हणजे, चांदे कुटुंबाने गेल्यावर्षीच होन्याळी येथे नवीन घर बांधले होते. मात्र त्या घराची अद्याप वास्तुशांतीही झाली नव्हती. नव्या घरात सुखाचे दिवस अनुभवण्याआधीच संपूर्ण कुटुंब काळाच्या पडद्याआड गेल्याने गावकऱ्यांनाही मोठा धक्का बसला आहे.

या अपघातात दीपक दत्तात्रय चांदे, त्यांची पत्नी शोभा चांदे, मुलगा जय चांदे आणि मुलगी पूर्वा चांदे यांचा जागीच मृत्यू झाला. दीपक चांदे हे कामानिमित्त मुंबई येथे वास्तव्यास होते. ते आपल्या आईसह आणि मोठ्या भावाच्या कुटुंबासोबत एकत्र राहत होते. काही वर्षांपूर्वी त्यांच्या मोठ्या भावाचे निधन झाले होते. त्यामुळे कुटुंबाची सर्व जबाबदारी दीपक यांच्या खांद्यावर होती.

मृतांची माहिती : Mummewadi Ghat Accident

उन्हाळी सुट्टीच्या निमित्ताने चांदे कुटुंब होन्याळी येथे आले होते. गावात काही दिवस आनंदात घालवल्यानंतर ते दुंडगे-माद्याळ येथे नातेवाईकांकडे जाण्यासाठी निघाले होते. दरम्यान, सायंकाळच्या सुमारास मुम्मेवाडी घाटात त्यांच्या दुचाकीला समोरून येणाऱ्या मालवाहू टेम्पोची जोरदार धडक बसली. हा अपघात इतका भीषण होता की, चौघांचाही घटनास्थळीच मृत्यू झाला.

उत्तूर–गडहिंग्लज काँक्रिटीकरण रस्त्याचे काम सुरू असल्याने चांदे कुटुंबीयांनी मुम्मेवाडी–बहिरेवाडी मार्गे दुंडगे-माद्याळ येथे जाण्याचा निर्णय घेतला होता. मात्र नियतीने त्यांच्यासाठी वेगळेच काही लिहून ठेवले होते. घाटातील या अपघाताने संपूर्ण कुटुंब हिरावून घेतले.

चांदे कुटुंबाने नुकतेच बांधलेल्या नव्या घरात भविष्यातील अनेक स्वप्ने रंगवली होती. घराची वास्तुशांती करण्याची तयारी सुरू होती. मात्र त्या घराच्या उंबरठ्यावर आनंदाचे क्षण येण्यापूर्वीच दु:खाचा डोंगर कोसळला. गावातील नागरिकांनी या घटनेबद्दल तीव्र हळहळ व्यक्त केली असून, नव्या घरात राहण्याचे स्वप्न अपूर्ण राहिल्याची खंत व्यक्त केली आहे.

अपघाताची माहिती मिळताच नातेवाईक, ग्रामस्थ आणि परिसरातील नागरिकांनी घटनास्थळी धाव घेतली. एका अपघातात चार निष्पाप जीव गमावल्याने होन्याळी गावात शोकमय वातावरण निर्माण झाले आहे. चांदे कुटुंबाच्या दुःखात संपूर्ण परिसर सहभागी झाला असून, गावकऱ्यांच्या डोळ्यांत अश्रू तरळले आहेत.

विशेष म्हणजे, चांदे कुटुंब मुंबईत वास्तव्यास असल्यामुळे त्यांचे गावी येणे-जाणे तुलनेने कमी होते. यावर्षी मात्र मुलांसोबत उन्हाळ्याची सुट्टी आनंदात घालवण्याचा त्यांनी निर्णय घेतला होता. होन्याळी येथे आठ ते दहा दिवस मुक्काम केल्यानंतर ते दुंडगे-माद्याळ येथे शोभा चांदे यांच्या माहेरी काही दिवस राहण्यासाठी निघाले होते. माहेरवाशीण येणार असल्याने तिच्या स्वागताची तयारी सुरू होती. कुटुंबीय त्यांच्या आगमनाची आतुरतेने वाट पाहत होते. परंतु नियतीने वेगळाच खेळ खेळला आणि ज्यांची वाट पाहिली जात होती, त्यांचे मृतदेह पाहण्याची दुर्दैवी वेळ नातेवाईकांवर आली.

या हृदयद्रावक घटनेमुळे संपूर्ण परिसर शोकसागरात बुडाला असून, चांदे कुटुंबाच्या निधनाने होन्याळी गावाने एक प्रेमळ आणि जिव्हाळ्याचे कुटुंब गमावले आहे.