हलाल प्रमाणपत्र वादाचा गोकुळला फटका; दूध खरेदी बंद करण्याचे फोन, कर्मचाऱ्यांचा संताप | Gokul Milk Halal Certification

कोल्हापूर : गोकुळ दूध संघाला हलाल प्रमाणपत्राच्या (Gokul Milk Halal Certification) वादाचा फटका बसू लागल्याचे चित्र समोर आले आहे. शुक्रवारी (दि. 29) दिवसभर गोकुळचे दूध खरेदी बंद करण्याबाबत अनेक फोन संघाच्या कार्यालयात येत होते. विशेषतः पुणे आणि मुंबईसारख्या मोठ्या बाजारपेठांमधूनही ग्राहक आणि विक्रेत्यांकडून दूध खरेदी थांबवत असल्याचे फोन आल्याची माहिती समोर आली आहे. या प्रकारामुळे गोकुळच्या ब्रँड प्रतिमेवर परिणाम होत असल्याची चिंता व्यक्त केली जात आहे.

हलाल प्रमाणपत्राच्या मुद्द्यावरून काही व्यक्तींनी संघातील अधिकारी आणि कर्मचाऱ्यांना फोनवरून शिवीगाळ केल्याचाही प्रकार घडला. यामुळे अधिकारी व कर्मचारी मानसिक त्रासाला सामोरे जात असून, सुरू असलेल्या या मोहिमेमुळे कर्मचाऱ्यांमध्ये तीव्र नाराजी पसरली आहे. गोकुळची बदनामी होत असताना प्रशासनाकडून ठोस भूमिका घेतली जात नसल्याचा आरोप करत कर्मचाऱ्यांनी प्रशासक संजयकुमार सुद्रीक यांची भेट घेतली.

शुक्रवारी सुमारे 250 कर्मचाऱ्यांनी एकत्र येत प्रशासकांकडे आपली भूमिका मांडली. हलाल प्रमाणपत्राच्या मुद्द्यावरून सुरू असलेल्या बदनामीविरोधात तातडीने कारवाई करण्याची मागणी त्यांनी केली. अफवा पसरविणाऱ्या तसेच अधिकारी व कर्मचाऱ्यांना शिवीगाळ करणाऱ्यांवर गुन्हे दाखल करण्यात यावेत, अशी मागणीही यावेळी करण्यात आली.

प्रशासक संजयकुमार सुद्रीक यांनी कर्मचाऱ्यांच्या भावना समजून घेत प्रकरणाची सविस्तर माहिती घेण्याचे आश्वासन दिले. संबंधितांवर कायदेशीर कारवाई करण्याबाबत योग्य ती पावले उचलली जातील, असे त्यांनी सांगितले. मात्र, जर कारवाई झाली नाही तर शेतकरी आणि कर्मचारी एकत्रितपणे हल्लाबोल आंदोलन छेडतील, असा इशारा कर्मचाऱ्यांनी दिला.

गोकुळ दूध संघाचा प्रवास अत्यंत उल्लेखनीय राहिला आहे. अवघ्या 700 लिटर दूध संकलनापासून सुरू झालेला हा ब्रँड आज तब्बल 17 लाख लिटर दूध संकलनापर्यंत पोहोचला आहे. अनेक सहकारी दूध संघ बाजारपेठेतील स्पर्धेमुळे टिकू शकले नाहीत. शासनाचा महानंदसारखा दूध संघही अडचणीत सापडला, मात्र गोकुळने स्वतःच्या भांडवलावर आणि मजबूत व्यवस्थापनाच्या बळावर प्रगती साधली आहे.

कर्मचाऱ्यांनी प्रशासकांसमोर भावना व्यक्त करताना सांगितले की, गोकुळच्या प्रतिमेला धक्का बसल्यास त्याचा थेट परिणाम लाखो दूध उत्पादक शेतकरी आणि हजारो कर्मचाऱ्यांवर होऊ शकतो. संघाची बाजारपेठ आणि ग्राहकांचा विश्वास टिकवून ठेवणे ही सध्या सर्वात मोठी गरज असल्याचे त्यांनी स्पष्ट केले.

यावेळी संघटनेचे जनरल सेक्रेटरी सदाशिव निकम, संदेश पाटील, योगेश चव्हाण, प्रकाश आडनाईक, प्रदीप पाटील, रमेश पाटील, शिवानंद शिरहट्टी, प्रवीण करडे यांच्यासह मोठ्या संख्येने कर्मचारी उपस्थित होते.

कर्मचाऱ्यांनी यावेळी एक महत्त्वाची भूमिका मांडली. गोकुळचे दूध हे स्वच्छ, दर्जेदार आणि पांढरे दूध आहे. त्याला धार्मिक किंवा राजकीय रंग देणे योग्य नाही, असे त्यांनी स्पष्ट केले. जिल्ह्यात राजकीय वर्चस्वातून अनेक दूध संघ स्थापन झाले, मात्र प्रभावी मार्केटिंगअभावी ते टिकू शकले नाहीत. त्यामुळे गोकुळच्या मार्केटिंग आणि ब्रँड प्रतिमेवर कोणताही विपरीत परिणाम होणार नाही यासाठी सर्व स्तरावर प्रयत्न होणे आवश्यक असल्याचे कर्मचाऱ्यांनी नमूद केले.