शाहरूख, विजय ते ऐश्वर्या रायलाही मागे टाकत युद्धवीर अहलावत ठरला सर्वाधिक चर्चेत | IMDb Popular Indian Celebrities

द इंटरनेट मुव्ही डेटाबेस म्हणजेच IMDb (IMDb Popular Indian Celebrities) दर आठवड्याला भारतातील सर्वाधिक लोकप्रिय सेलिब्रिटींची यादी जाहीर करत असते. इंटरनेटवर कोणत्या कलाकारांच्या प्रोफाईलला सर्वाधिक भेटी मिळतात, कोणत्या कलाकारांबद्दल प्रेक्षकांची उत्सुकता वाढली आहे आणि कोणते कलाकार सध्या चर्चेत आहेत, याच्या आधारे ही यादी तयार केली जाते. त्यामुळे थिएटरमध्ये किंवा ओटीटी प्लॅटफॉर्मवर नुकतेच प्रदर्शित झालेले चित्रपट, वेब सिरीज किंवा चर्चेत असलेल्या कलाकारांचा या यादीत मोठा प्रभाव दिसून येतो.

मात्र या आठवड्यात जाहीर झालेल्या IMDb च्या लोकप्रिय भारतीय सेलिब्रिटींच्या यादीने अनेकांना आश्चर्याचा धक्का दिला आहे. कारण या यादीत अव्वल स्थानावर एखादा मोठा सुपरस्टार नसून अभिनेता युद्धवीर अहलावत याचे नाव झळकले आहे. विशेष म्हणजे युद्धवीरने शाहरुख खान, थलपती विजय,ऐश्वर्या राय बच्चन, ज्युनियर एनटीआर आणि मोहनलाल यांसारख्या दिग्गज कलाकारांनाही मागे टाकले आहे.

IMDb इंडियाने नुकतीच टॉप 30 लोकप्रिय भारतीय सेलिब्रिटींची यादी जाहीर केली. या यादीत युद्धवीर अहलावत पहिल्या क्रमांकावर पोहोचला आहे. नेटफ्लिक्सवर प्रदर्शित झालेल्या Kartavya या चित्रपटामुळे त्याची लोकप्रियता झपाट्याने वाढली आहे. या चित्रपटात अभिनेता Saif Ali Khan मुख्य भूमिकेत दिसत आहे, तर युद्धवीरने 14 वर्षांच्या मुलाची भूमिका साकारली आहे. त्याच्या अभिनयाचे सोशल मीडियावर तसेच प्रेक्षकांकडून मोठ्या प्रमाणावर कौतुक होत आहे. त्यामुळे अनेक प्रेक्षकांनी त्याच्या IMDb प्रोफाईलला भेट दिली आणि त्याचाच परिणाम म्हणून तो लोकप्रियतेच्या शर्यतीत अव्वल ठरला.

‘कर्तव्य’ हा चित्रपट 15 मे रोजी नेटफ्लिक्सवर प्रदर्शित झाला. चित्रपट रिलीज झाल्यानंतर युद्धवीरबद्दल प्रेक्षकांमध्ये मोठी उत्सुकता निर्माण झाली. त्याचा साधा लूक आणि नैसर्गिक अभिनय प्रेक्षकांच्या पसंतीस उतरला आहे. युद्धवीर हा मूळचा हरियाणातील असून त्याने 2019 मध्ये Saand Ki Aankh या चित्रपटातून अभिनय क्षेत्रात पदार्पण केले होते. त्यानंतर तो Love Hostel आणि Co-Ed या वेब सिरीजमध्येही झळकला होता.

युद्धवीरबद्दल आणखी एक गोष्ट चर्चेत आली होती. ‘कर्तव्य’ चित्रपटात त्याने किशोरवयीन मुलाची भूमिका साकारली असली तरी तो प्रत्यक्षात अल्पवयीन नसल्याचे त्याने स्पष्ट केले होते. त्याच्या या भूमिकेतील परफॉर्मन्समुळे अनेक प्रेक्षक प्रभावित झाले आहेत.

IMDb लोकप्रिय सेलिब्रिटी यादीतील काही प्रमुख नावे : IMDb Popular Indian Celebrities

IMDb ने दिलेल्या माहितीनुसार, ही यादी जागतिक स्तरावर ट्रेंड होणाऱ्या भारतीय कलाकारांच्या प्रोफाईलवरील भेटींवर आधारित असते. यात अभिनेता, अभिनेत्री, दिग्दर्शक, लेखक आणि सिनेमॅटोग्राफर यांचा समावेश केला जातो. जगभरातील 250 मिलियनपेक्षा जास्त युजर्स IMDb प्लॅटफॉर्मला भेट देतात. ठराविक कालावधीत कोणत्या कलाकाराच्या प्रोफाईलवर सर्वाधिक ट्रॅफिक आले आहे, त्यावरून ही लोकप्रियतेची क्रमवारी निश्चित केली जाते.