म्हाकवेत चेन स्नॅचिंग; महिलेचे गंठण घेऊन चोरटे पसार… |Kolhapur News Chain Snatching
Motorcycle-borne thieves snatch gold necklace from woman during evening walk in Mhakave.
कोल्हापूर :कागल तालुक्यातील म्हाकवे गावात सायंकाळी फिरायला गेलेल्या महिलेच्या गळ्यातील एक तोळ्याचे सोन्याचे गंठण (Kolhapur News Chain Snatching) मोटरसायकलवरून आलेल्या चोरट्याने हिसका मारून लंपास केल्याची घटना घडली आहे. या घटनेमुळे परिसरात खळबळ उडाली असून नागरिकांमध्ये भीतीचे वातावरण निर्माण झाले आहे. विशेष म्हणजे पती-पत्नी एकत्र फिरायला गेले असताना अशा प्रकारे गंठण चोरीची घटना घडण्याची परिसरातील ही पहिलीच घटना असल्याचे सांगितले जात आहे.
मिळालेल्या माहितीनुसार, म्हाकवे येथील विद्या बापूसो पवार या आपल्या पती बापूसो पवार यांच्यासोबत सायंकाळी साडेसहा ते सातच्या दरम्यान फिरण्यासाठी बाहेर पडल्या होत्या. दोघेही आणूरकडील रस्त्याच्या दिशेने फेरफटका मारण्यासाठी गेले होते. दरम्यान, अचानक मोटरसायकलवरून आलेल्या चोरट्याने विद्या पवार यांच्या गळ्यातील सोन्याच्या गंठणावर डल्ला मारला. काही क्षणातच त्याने गंठण हिसका मारून काढले आणि आणूरच्या दिशेने वेगाने पळ काढला.
घटना इतक्या झपाट्याने घडली की पती-पत्नीला काही समजण्याच्या आतच चोरटा घटनास्थळावरून पसार झाला. या प्रकारामुळे विद्या पवार आणि त्यांच्या कुटुंबीयांना मोठा धक्का बसला आहे. परिसरात यापूर्वी अशा प्रकारची घटना घडली नसल्याने नागरिकांमध्येही चिंता व्यक्त केली जात आहे. सायंकाळच्या वेळी फिरण्यासाठी बाहेर पडणाऱ्या नागरिकांनी आता अधिक सतर्क राहण्याची गरज असल्याचे बोलले जात आहे.
या घटनेची माहिती मिळाल्यानंतर कागल पोलिसांनी तत्काळ तपासाची चक्रे फिरवली. पोलिसांनी म्हाकवे आणि आणूर परिसरातील सीसीटीव्ही फुटेजची पाहणी केली. तपासादरम्यान आणूर येथील एका सीसीटीव्ही कॅमेऱ्यात दोन संशयित मोटरसायकलवरून जाताना दिसून आले आहेत. या फुटेजच्या आधारे पोलिसांनी संशयितांचा शोध सुरू केला असून पुढील तपास सुरू आहे.
दरम्यान, या प्रकरणाची नोंद कागल पोलीस ठाण्यात करण्यात आली असून चोरी करणाऱ्या आरोपींचा लवकरच माग काढण्यात येईल, असा विश्वास पोलिसांकडून व्यक्त करण्यात येत आहे. परिसरातील नागरिकांनीही संशयास्पद हालचाली आढळल्यास तात्काळ पोलिसांना माहिती देण्याचे आवाहन करण्यात आले आहे.