गोकुळच्या २५ जागांसाठी महायुतीत रस्सीखेच; जागावाटपावरून वाढला तणाव | Gokul Election News

कोल्हापूर : कोल्हापूर जिल्हा सहकारी दूध उत्पादक संघ अर्थात ‘गोकुळ (Gokul Election News) ‘ दूध संघाच्या निवडणुकीची अधिकृत प्रक्रिया सुरू झाली असून जिल्ह्यातील राजकीय वातावरण पुन्हा एकदा तापू लागले आहे. सध्या विविध दूध संस्थांकडून ठराव सादर करण्याचे काम सुरू आहे. अंतिम मतदानाची तारीख अद्याप जाहीर झालेली नसली तरी सप्टेंबर महिन्यात निवडणूक होण्याची शक्यता व्यक्त केली जात आहे. मात्र निवडणुकीची औपचारिक घोषणा होण्यापूर्वीच महायुतीमध्ये जागावाटपावरून पडद्यामागील हालचाली आणि दावे-प्रतिदावे सुरू झाल्याचे चित्र दिसून येत आहे.

कोल्हापूर जिल्ह्याच्या राजकारणात गोकुळ दूध संघाला अत्यंत महत्त्वाचे स्थान आहे. जिल्ह्यातील अनेक राजकीय समीकरणे आणि नेतृत्वाची ताकद या निवडणुकीतून अधोरेखित होत असते. याच पार्श्वभूमीवर मुख्यमंत्री देवेंद्र फडणवीस यांनी महायुतीतील सर्व घटक पक्षांनी एकत्र येत आगामी गोकुळ निवडणूक महायुतीच्या बॅनरखाली लढवावी, अशा सूचना दिल्या होत्या. त्यानुसार महायुतीतील प्रमुख नेत्यांची बैठकही पार पडली. मात्र या बैठकीनंतरही महायुतीतील अंतर्गत मतभेद कमी होण्याऐवजी अधिक ठळकपणे समोर येत असल्याचे दिसत आहे.

महायुतीचे सहयोगी आमदार शिवाजीराव पाटील यांना बैठकीचे निमंत्रण देण्यात आले नसल्याने त्यांनी उघडपणे नाराजी व्यक्त केली. एवढेच नव्हे तर गरज पडल्यास विरोधकांसोबत जाण्याची भाषा देखील त्यांनी केल्याने राजकीय चर्चांना उधाण आले आहे. त्यामुळे निवडणुकीच्या तोंडावर महायुतीतील सर्व नेते एकत्र राहतील का, असा प्रश्न उपस्थित होऊ लागला आहे.

मागील काही महिन्यांपासून जिल्ह्यात महायुतीतील घटक पक्षांमध्ये शह-कटशहाचे राजकारण सुरू असल्याची चर्चा आहे. वरिष्ठ पातळीवर नेते एकत्र दिसत असले तरी स्थानिक पातळीवरील माजी संचालक, संस्था सभासद आणि कार्यकर्ते कितपत एकनिष्ठ राहतील, याबाबत साशंकता व्यक्त केली जात आहे. यामुळे निवडणुकीत अधिकृत पॅनेल उभे राहिल्यानंतरही अंतर्गत विरोध आणि नाराजीचा फटका बसण्याची शक्यता नाकारता येत नाही.

महायुतीमध्ये राष्ट्रवादी काँग्रेस, शिवसेना, भाजप आणि जनसुराज्य शक्ती या चार प्रमुख घटक पक्षांचा समावेश आहे. गोकुळच्या २५ जागांसाठी होणाऱ्या निवडणुकीत सर्वच पक्षांमध्ये इच्छुकांची संख्या मोठी असल्याने जागावाटपाचा प्रश्न अत्यंत गुंतागुंतीचा ठरणार आहे. प्रत्येक पक्षाला अधिकाधिक जागा मिळाव्यात, अशी अपेक्षा असल्याने पॅनेलची रचना करताना मोठी कसरत करावी लागणार आहे.

विशेषतः राष्ट्रवादी काँग्रेस आणि शिवसेनेकडे इच्छुकांची संख्या अधिक असल्याचे बोलले जात आहे. भाजपमध्ये तुलनेने इच्छुकांची संख्या कमी असली तरी राज्यातील मोठा भाऊ म्हणून भाजपला गोकुळमध्येही अधिक प्रतिनिधित्व हवे असल्याची भूमिका असल्याचे सांगितले जाते. गोकुळच्या पॅनेलमध्ये स्थान मिळणे म्हणजे संचालकपद निश्चित मानले जाते. त्यामुळे उमेदवारी मिळवण्यासाठी इच्छुकांची संख्या दिवसेंदिवस वाढताना दिसत आहे.

यामुळे उमेदवारी न मिळालेल्या इच्छुकांची नाराजी कितपत नियंत्रित ठेवता येते, यावरच महायुतीच्या संपूर्ण पॅनेलचे भवितव्य अवलंबून राहणार आहे. त्यामुळे गोकुळ निवडणुकीत विरोधकांपेक्षा महायुतीसमोरील सर्वात मोठे आव्हान हे जागावाटप आणि अंतर्गत नाराजी व्यवस्थापनाचेच असणार असल्याची चर्चा राजकीय वर्तुळात सुरू झाली आहे.