“हजार कोटी आणा, हत्तीवरून मिरवणूक काढू”; सतेज पाटीलांचा क्षीरसागरांना उपरोधिक टोला | Kolhapur Satej Patil

कोल्हापूर : विकासाला विरोध करतोय, अशी टीका करणाऱ्या आमदार राजेश क्षीरसागर यांनी प्रथम शहरातील शंभर कोटी रुपयांच्या रस्ते कामांचे नेमके काय झाले, याचे स्पष्टीकरण द्यावे. तसेच मुख्यमंत्री आणि राज्य सरकारकडे पाठपुरावा करून कोल्हापूरच्या विकासासाठी एक हजार कोटी रुपयांचा निधी आणावा आणि शहरातील रस्त्यांची दुरुस्ती करावी. असे केल्यास त्यांची हत्तीवरून मिरवणूक काढू, असा उपरोधिक टोला आमदार सतेज पाटील (Kolhapur Satej Patil) यांनी पत्रकार परिषदेत बोलताना लगावला.

आमदार पाटील यांनी शहरातील विकासकामे, वीजटंचाई, पाणीटंचाई, स्मार्ट मीटर आणि शक्तिपीठ महामार्ग या विविध विषयांवर सरकारवर जोरदार टीका केली. त्यांनी सांगितले की, आमदार राजेश क्षीरसागर यांनी विकासाच्या मुद्द्यावर टीका करण्यापेक्षा आधी मंजूर झालेल्या शंभर कोटी रुपयांच्या रस्ते कामांची स्थिती जनतेसमोर मांडावी. त्यानंतर राज्य सरकारकडून अधिक निधी मिळवून शहरातील रस्त्यांची दुरवस्था दूर करण्यासाठी प्रयत्न करावेत.

पाटील यांनी राज्यातील वीज आणि पाणी व्यवस्थापनावरही प्रश्नचिन्ह उपस्थित केले. उन्हाळ्याच्या तीव्रतेमुळे अनेक भागांत पाणी उपसा बंदी लागू करण्यात आली आहे. विजेचा तुटवडा निर्माण झाल्याने शेतकऱ्यांना मोठ्या अडचणींचा सामना करावा लागत आहे. मुख्यमंत्री यांनी जानेवारी महिन्यातच संभाव्य पाणीटंचाईचा इशारा दिला होता. त्यानंतरही सरकारने आवश्यक नियोजन का केले नाही, असा सवाल त्यांनी उपस्थित केला.

त्यांच्या मते, कोयना धरणातील पाणीसाठा कमी असल्यामुळे सुमारे दोन हजार मेगावॅट विजेचा तुटवडा निर्माण झाल्याचे सरकार सांगत आहे. मात्र याबाबत आगाऊ नियोजन करण्यात सरकार अपयशी ठरले. या निष्क्रिय धोरणाचा थेट फटका राज्यातील शेतकऱ्यांना बसत आहे. अनेक भागांत शेतकऱ्यांना अखंडित आठ तास वीजपुरवठाही मिळत नसल्याची स्थिती आहे.

वीज वितरण व्यवस्थेवर भाष्य करताना त्यांनी सांगितले की, वसुलीत राज्याला क्रमांक एकचे बक्षीस मिळाले असले तरी सध्याच्या परिस्थितीत थकबाकी वाढण्याची शक्यता आहे. त्यामुळे भविष्यात थकबाकीसाठीही बक्षीस मिळेल, अशी परिस्थिती सरकार निर्माण करत असल्याचा इशाराही त्यांनी दिला.

स्मार्ट मीटर योजनेवर टीका करताना आमदार पाटील म्हणाले की, ग्राहकांची इच्छा असेल तरच स्मार्ट मीटर बसवावेत. अनेक ग्राहक स्मार्ट मीटर बसवल्यानंतर वीजबिल वाढत असल्याच्या तक्रारी करत आहेत. तसेच स्मार्ट मीटरचा ठेका मिळालेल्या कंपन्यांनी भाजपला आर्थिक मदत केल्याचा आरोपही त्यांनी केला. त्यामुळे सरकार या विषयात कोणती भूमिका घेणार, असा सवाल त्यांनी उपस्थित केला.

शक्तिपीठ महामार्ग प्रकल्पाबाबत बोलताना त्यांनी हा महामार्ग राज्यासाठी आवश्यक नसल्याचे सांगितले. हा प्रकल्प रद्द करून त्यासाठी खर्च होणारा अंदाजे एक लाख कोटी रुपयांचा निधी इतर विकासकामांसाठी वापरावा, अशी मागणी त्यांनी केली. या मागणीसाठी राज्याच्या विविध भागांतून शेतकरी मोर्चात सहभागी होणार असल्याचेही त्यांनी स्पष्ट केले.

सरकारच्या विकास, वीज, पाणी आणि पायाभूत सुविधांबाबतच्या धोरणांवर प्रश्न उपस्थित करत आमदार सतेज पाटील यांनी राज्य प्रशासनाने अधिक प्रभावी नियोजन करण्याची गरज असल्याचे अधोरेखित केले.