कॉमर्स शाखेतून 12वी पूर्ण केली असेल, तर या AI कोर्सेससह पदवी मिळवा; नोकरीसाठी परदेशातूनही येतील ऑफर!

मुंबई | बारावी नंतर वाणिज्य शाखेतील विद्यार्थ्यांसमोर करिअर निवडण्याचा मोठा प्रश्न असतो. पारंपरिक बीकॉम, बीबीए किंवा बीसीएसारख्या पदवी अभ्यासक्रमांबरोबरच आता आर्टिफिशियल इंटेलिजेंस (AI) आणि डेटा सायन्स सारख्या आधुनिक क्षेत्रांमध्येही मोठ्या संधी उपलब्ध झाल्या आहेत. आज डिजिटल युगात, फक्त देशातच नव्हे तर आंतरराष्ट्रीय स्तरावरही एआय कौशल्ये असणाऱ्या तरुणांना प्रचंड मागणी आहे.

विशेष म्हणजे, वाणिज्य शाखेतून शिकलेले विद्यार्थीही आता या क्षेत्रात आपले भविष्य घडवू शकतात. बीबीए, बीकॉम, बीसीए या पारंपरिक अभ्यासक्रमांमध्ये एआयची जोड देणारे नवे कोर्सेस विद्यार्थ्यांना उद्योग विश्लेषण, डेटा अॅनालिटिक्स आणि ऑटोमेशनसारख्या प्रगत कौशल्यांचे प्रशिक्षण देतात.

बीबीए इन डेटा सायन्स अ‍ॅण्ड एआय – BBA in Data Science and AI

हा अभ्यासक्रम व्यवस्थापन आणि आर्टिफिशियल इंटेलिजेंस यांचा उत्तम समन्वय साधतो. या कोर्सद्वारे विद्यार्थ्यांना उद्योग विश्लेषण, डेटा व्हिज्युअलायझेशन आणि एआय आधारित निर्णय प्रक्रियेचा अनुभव मिळतो. सिम्बायोसिस सेंटर फॉर मॅनेजमेंट स्टडीज (पुणे) आणि क्राइस्ट युनिव्हर्सिटी (बेंगळुरू) येथे हा अभ्यासक्रम उपलब्ध आहे. कालावधी तीन वर्षे असून बारावीत ५०-६०% गुण आवश्यक आहेत.

बी.कॉम विथ एआय – B.Com with AI

अकाउंटिंग क्षेत्रातील विद्यार्थ्यांसाठी बीकॉममध्ये एआय टूल्सचा समावेश करून ऑटोमेशन, डेटा अॅनालिटिक्स आणि स्मार्ट रिपोर्टिंग शिकवले जाते. युनिव्हर्सल एआय युनिव्हर्सिटी (मुंबई) आणि सेंट झेवियर्स कॉलेज (मुंबई) मध्ये हा कोर्स उपलब्ध असून त्याची कालावधी तीन वर्षे आहे. पात्रतेसाठी बारावीत किमान ५०% गुण आवश्यक आहेत.

बीसीए इन आर्टिफिशियल इंटेलिजेंस – BCA in Artificial Intelligence

तंत्रज्ञान आणि संगणक क्षेत्रात रुची असलेल्या वाणिज्य शाखेतील विद्यार्थ्यांसाठी बीसीए इन एआय हा उत्तम पर्याय आहे. यामध्ये मशीन लर्निंग, एआय प्रोग्रामिंग, आणि डेटा मायनिंगसारखे महत्त्वाचे विषय शिकवले जातात. जयपूर नॅशनल युनिव्हर्सिटी व एलपीयू (पंजाब) या संस्थांमध्ये प्रवेश घेता येतो. कोर्स तीन वर्षांचा असून गणित हा विषय बारावीत असणे गरजेचे आहे.

लघुकालीन डिप्लोमा व प्रमाणपत्र अभ्यासक्रम

ज्या विद्यार्थ्यांना पदवी अभ्यासक्रमाशिवाय वेगाने एआय शिकायचे आहे त्यांच्यासाठी कोर्सेरा, उडेमी, एडएक्स या ऑनलाईन प्लॅटफॉर्मवर ६ महिने ते १ वर्ष कालावधीचे एआय डिप्लोमा कोर्सेस उपलब्ध आहेत. यामध्ये प्रॉम्प्ट इंजिनिअरिंग, चॅटजीपीटी वापर, व एआय टूल्सचे प्रॅक्टिकल प्रशिक्षण दिले जाते.

प्रमाणपत्र अभ्यासक्रम

गुगल एआय इसेन्शियल्स, आयबीएम स्किल्सबिल्ड, पिकल.एआय यांसारख्या प्लॅटफॉर्मवर ३ ते ६ महिन्यांचे कमी खर्चिक अभ्यासक्रम उपलब्ध आहेत. दहावी किंवा बारावी पास विद्यार्थी हे कोर्स करू शकतात.

एआय कोर्सेसचे फायदे – Benefits of AI courses

• डेटा विश्लेषण कौशल्य : ग्राहकांचे वर्तन, ट्रेंड्स समजून निर्णय घेण्याची क्षमता.
• उत्तम पगाराच्या नोकऱ्या : डेटा अॅनालिस्ट, एआय कन्सल्टंटसारख्या पदांसाठी दरवर्षी ₹३ ते ₹१२ लाखांपर्यंत वेतनाची संधी.
• कोडिंगशिवाय संधी : प्रॉम्प्ट इंजिनिअरिंग, एआय टूल टेस्टिंगसारख्या नोकऱ्या.
• जागतिक संधी : MSM Unify सारख्या संस्था व्हिसा व शिष्यवृत्ती मार्गदर्शन देतात.
• स्टार्टअप्ससाठी उपयुक्त : ई-कॉमर्स, डिजिटल मार्केटिंगसाठी एआय वापरता येते.

वाणिज्य शाखेतील विद्यार्थ्यांनी आता पारंपरिक मर्यादांपलीकडे पाहून एआयसारख्या आधुनिक क्षेत्रात करिअर घडवावे, अशी सल्ला शिक्षणतज्ज्ञ देत आहेत. कारण हे क्षेत्र भविष्यातील रोजगाराची मोठी संधी घेऊन येत आहे.