अकीवाट येथील ट्रॅक्टर अपघातात वाहून गेलेले इकबाल बैरागदार यांचा मृतदेह 4 महिन्यांनी सापडला | Akiwat Shirol Tractor Accident
कोल्हापूर | अकीवाट (ता. शिरोळ) येथे ऑगस्ट महिन्यात कृष्णा नदीच्या महापुरात झालेल्या ट्रॅक्टर अपघातात वाहून गेलेले इकबाल बाबासो बैरागदार (वय 56) यांचा मृतदेह चार महिन्यांनी कर्नाटकातील इंगळी (ता. चिकोडी, जि. बेळगाव) येथील कृष्णा नदीच्या पात्रात सापडला आहे. मृतदेहाजवळ सापडलेल्या मोबाईल, सुपारीच्या डब्याने, तसेच कपड्यांवरील खुणांवरून त्यांची ओळख पटली.
ट्रॅक्टर अपघाताची पार्श्वभूमी
२ ऑगस्ट २०२४ रोजी बैरागदार आणि त्यांचे सहकारी बस्तवाड शेताकडे जात असताना, पूर आलेल्या कृष्णा नदीवरील पुलावरून ट्रॅक्टर कोसळला होता. या अपघातात चार जण बचावले, तर सुहास पाटील यांचा उपचारादरम्यान मृत्यू झाला. आण्णासाहेब हसुरे आणि इकबाल बैरागदार वाहून गेले होते. हसुरे यांचा मृतदेह तीन दिवसांत सापडला, मात्र बैरागदार यांचा शोध लागला नव्हता.
नातेवाईकांची अथक शोधमोहीम
सरकारने शोधमोहीम थांबवली तरी बैरागदार यांच्या कुटुंबीयांनी आशा सोडली नाही. त्यांनी मागील चार महिन्यांपासून नदीकाठावर पत्रके वाटणे, माध्यमांमध्ये माहिती देणे, आणि सतत चौकशी करत प्रयत्न सुरू ठेवले. अखेर इंगळी येथील कृष्णा नदीच्या पात्रात मंगळवारी त्यांचा मृतदेह सापडला.
सुपारीचा डबा, मोबाईलच्या पिशवीवरून पटली ओळख
मृतदेहाजवळ सापडलेला सुपारीचा डबा, मोबाईल, क्रीम रंगाची पँट, व लाइनिंग टी-शर्ट यांच्या आधारे बैरागदार यांची ओळख पटली.
अंत्यसंस्कार आणि कुटुंबीयांचे दु:ख
मृतदेह अकीवाट येथे आणून त्यांच्यावर अंत्यसंस्कार करण्यात येणार आहेत. मृतदेह मिळाल्यामुळे धार्मिक विधी पूर्ण होण्याचे समाधान कुटुंबीयांना मिळाले आहे. मात्र, या घटनेने बैरागदार यांचे कुटुंब व मित्रपरिवार शोकमग्न झाला आहे.