पुरवठा विभागाची धडाकेबाज कारवाई: महाकाली मंदिर परिसरात चालणारा अवैध गॅस रिफिलिंगचा अड्डा उद्ध्वस्त | Kolhapur Crime News
कोल्हापूर | शहरातील अत्यंत गजबजलेल्या शिवाजी पेठेतील महाकाली मंदिर परिसरात घरगुती एलपीजी गॅस सिलिंडरमधून व्यावसायिक ऑटो रिक्षांमध्ये अत्यंत धोकादायक पद्धतीने गॅस रिफिलिंग करणाऱ्या अवैध व्यवसायावर जिल्हा पुरवठा विभागाने मोठी कारवाई (Kolhapur Crime News) केली आहे. जिल्हा पुरवठा अधिकारी मोहिनी चव्हाण यांच्या मार्गदर्शनाखाली आणि सहाय्यक जिल्हा पुरवठा अधिकारी लक्ष्मण माने यांच्या नेतृत्वाखालील पथकाने १ जून रोजी सायंकाळी छापा टाकत या बेकायदेशीर रॅकेटचा पर्दाफाश केला. या कारवाईत गॅस भरण्यासाठी वापरल्या जाणाऱ्या मोटारी, गॅस सिलिंडर्स, डिजिटल पेमेंट साहित्य तसेच इतर उपकरणांसह एकूण ३८,८०० रुपयांचा मुद्देमाल जप्त करण्यात आला आहे.
पुरवठा विभागाला महाकाली मंदिर परिसरात एका ऑटो रिक्षामध्ये बेकायदेशीररीत्या गॅस भरला जात असल्याची खात्रीशीर गुप्त माहिती मिळाली होती. या माहितीची पडताळणी केल्यानंतर तातडीने कारवाईची योजना आखण्यात आली. त्यानुसार जिल्हा पुरवठा अधिकारी मोहिनी चव्हाण यांच्या सूचनेनुसार सहाय्यक जिल्हा पुरवठा अधिकारी लक्ष्मण माने यांच्या नेतृत्वाखाली विशेष पथक तयार करण्यात आले आणि संबंधित ठिकाणी धाड टाकण्यात आली.
कारवाईदरम्यान पथकाने घटनास्थळालगत असलेल्या एका कौलारू घराची झाडाझडती घेतली. या तपासणीमध्ये घरगुती गॅस सिलिंडरमधून व्यावसायिक वाहनांमध्ये गॅस भरून देण्याचा धोकादायक आणि बेकायदेशीर व्यवसाय सुरू असल्याचे उघड झाले. विशेष म्हणजे, हा व्यवसाय राजरोसपणे सुरू असल्याचे तपासात समोर आले.
या प्रकरणी राजेंद्र चंद्रकांत मस्के (वय ४८, रा. लक्षतीर्थ वसाहत) आणि स्वप्निल शिंदे (वय १८ वर्ष) यांना ताब्यात घेण्यात आले आहे. दोघांवरही विनापरवाना व्यवसाय केल्याप्रकरणी भारतीय नागरी सुरक्षा संहिता (BNS 2023) कलम २८७ तसेच जीवनावश्यक वस्तू कायदा १९५५ मधील कलम ३ आणि ७ अन्वये जुना राजवाडा पोलीस ठाण्यात गुन्हा दाखल करण्यात आला आहे.
कारवाईदरम्यान जप्त करण्यात आलेल्या साहित्यामध्ये गॅस रिफिलिंगसाठी वापरल्या जाणाऱ्या दोन एचपी क्षमतेच्या इलेक्ट्रिक मोटारी, एचपीसीएलचे रिकामे आणि भरलेले गॅस सिलिंडर्स, इलेक्ट्रॉनिक वजनकाटा, डिजिटल पेमेंटसाठी वापरण्यात येणारे पेटीएम स्कॅनर आणि क्यूआर कोड बोर्ड, तसेच नोझल, पाईप आणि केबल बोर्ड यांचा समावेश आहे. या सर्व साहित्याची एकूण किंमत ३८,८०० रुपये असल्याचे प्रशासनाने स्पष्ट केले आहे.
या कारवाईनंतर जिल्हा पुरवठा अधिकारी मोहिनी चव्हाण यांनी स्पष्ट इशारा दिला आहे की, कोल्हापूर शहर आणि जिल्ह्यात कुठेही अवैध गॅस रिफिलिंग, काळाबाजार, जीवनावश्यक वस्तूंची साठेबाजी अथवा अशा प्रकारचे बेकायदेशीर व्यवहार सुरू असल्याचे आढळल्यास संबंधितांविरोधात कठोर आणि दंडात्मक कारवाई करण्यात येईल. तसेच नागरिकांनी अशा प्रकारच्या बेकायदेशीर कृत्यांची माहिती प्रशासनाला देऊन सतर्क नागरिक म्हणून सहकार्य करावे, असे आवाहनही त्यांनी केले.
या यशस्वी कारवाईत पुरवठा निरीक्षक महेश काटकर, नम्रता कुडाळकर, तुषार पाटील, अभिजित खोत, लिपिक विपुल पाटील, जयवंत गोते, सुशीलकुमार खोंद्रे तसेच पोलीस हेड कॉन्स्टेबल अमोल पाटील यांनी महत्त्वाची भूमिका बजावली.