कोल्हापूरला गांजा विक्रीसाठी नेताना निपाणीतील दोघे जेरबंद; ५५ हजारांचा मुद्देमाल जप्त | Kolhapur Karnataka Crime

कोल्हापूर : निपाणी येथून कोल्हापूरमध्ये विक्रीसाठी गांजाची तस्करी करणाऱ्या दोन युवकांवर शहर पोलिसांनी धडक कारवाई करत त्यांच्याकडून गांजा (Kolhapur Karnataka Crime) आणि दुचाकीसह एकूण ५५ हजार रुपयांचा मुद्देमाल जप्त केला आहे. या प्रकरणात दोघांना अटक करण्यात आली असून त्यांना गांजा पुरवठा करणारा कोल्हापूर येथील एक संशयित फरार असल्याने त्याचा शोध सुरू करण्यात आला आहे.

पोलिसांनी दिलेल्या माहितीनुसार, राहुल महांतेश सावंत (वय २१, रा. आश्रमनगर, निपाणी) आणि जाफरसादिक नदीम बशीर पठाण (वय २१, रा. तहसीलदार प्लॉट, निपाणी) अशी अटक करण्यात आलेल्या दोघांची नावे आहेत. या दोघांकडून सुमारे २३ हजार रुपये किमतीचा ४०० ग्रॅम गांजा जप्त करण्यात आला. तसेच वाहतुकीसाठी वापरण्यात आलेली दुचाकीही पोलिसांनी ताब्यात घेतली असून जप्त केलेल्या मुद्देमालाची एकूण किंमत सुमारे ५५ हजार रुपये असल्याचे सांगण्यात आले.

शहर पोलिसांना गुप्त माहिती मिळाली होती की, निपाणी-कोल्हापूर रोडवरील कोल्हापूर वेस भुयारी मार्गाजवळ दोन व्यक्ती गांजा विक्रीसाठी येणार आहेत. या माहितीची खातरजमा करून पोलिसांनी तात्काळ सापळा रचला. सीबीआय बी. एस. तळवार यांच्या मार्गदर्शनाखाली उपनिरीक्षक शिवानंद कार्जोळ यांच्या नेतृत्वाखाली विशेष पथकाने संबंधित ठिकाणी कारवाई केली.

या पथकात सहाय्यक पोलीस उपनिरीक्षक विठ्ठल पुजारी, सहाय्यक पोलीस उपनिरीक्षिका एस. एस. नरसाप्पानावर, हवालदार संजय काडगौडर, उमेश माळगे, आर. एस. ढंग, यासीन कलावंत आणि प्रभू सिद्धांतगीमठ यांचा समावेश होता. पोलिसांनी संशयित राहुल सावंत आणि जाफर पठाण यांना ताब्यात घेऊन त्यांची झडती घेतली असता त्यांच्या ताब्यातून ४०० ग्रॅम गांजा आढळून आला.

त्यानंतर दोघांकडे अधिक चौकशी करण्यात आली. चौकशीदरम्यान त्यांनी हा गांजा कोल्हापूर येथील सलीम (वय ३५) नावाच्या व्यक्तीकडून विक्रीसाठी खरेदी केल्याची कबुली दिली. या माहितीच्या आधारे पोलिसांनी सलीम याच्याविरुद्धही गुन्हा नोंदवून त्याचा शोध सुरू केला आहे. मात्र कारवाईच्या वेळी तो फरार असल्याने पोलिसांकडून त्याचा माग काढण्याचे प्रयत्न सुरू आहेत.

या प्रकरणी राहुल सावंत आणि जाफरसादिक पठाण या दोघांविरुद्ध अंमली पदार्थ विरोधी कायद्यान्वये गुन्हा दाखल करण्यात आला आहे. शहर पोलिसांकडून या प्रकरणाचा पुढील तपास सुरू असून गांजाच्या पुरवठ्यामागील साखळी उघड करण्याच्या दृष्टीने तपास यंत्रणा काम करत आहे. या कारवाईमुळे निपाणी आणि कोल्हापूर परिसरातील अंमली पदार्थांच्या अवैध व्यवहारांवर आळा बसण्यास मदत होणार असल्याचे मानले जात आहे.