“गोकुळ निवडणुकीत ४४१ दूध संस्था अपात्र; आकडा ६५० पार जाणार?” | Kolhapur News Gokul Election

कोल्हापूर : गोकुळ दूध संघाच्या आगामी निवडणुकीच्या पार्श्वभूमीवर सुरू असलेल्या अवसायन प्रक्रियेत जिल्ह्यातील मोठ्या संख्येने दूध संस्थांना फटका बसल्याचे स्पष्ट झाले आहे. आतापर्यंत झालेल्या छाननी प्रक्रियेनुसार भुदरगड तालुक्यातील सर्वाधिक १०१ दूध संस्था (Kolhapur News Gokul Election) अपात्र ठरल्या आहेत. त्यानंतर गडहिंग्लज, शाहूवाडी, करवीर आणि पन्हाळा तालुक्यातील अनेक संस्थांनाही अपात्रतेचा सामना करावा लागला आहे. सध्या एकूण ४४१ दूध संस्था गोकुळ निवडणुकीसाठी अपात्र ठरल्या असून प्रलंबित असलेल्या संस्थांबाबतचा अंतिम निर्णय बुधवारी स्पष्ट होणार आहे.

गोकुळ निवडणुकीसाठी पात्र व अपात्र संस्थांची अंतिम आकडेवारी निश्चित करण्याचे काम सहायक निबंधक कार्यालयात युद्धपातळीवर सुरू आहे. सुनावणी प्रक्रिया पूर्ण झाल्यानंतर सोमवारी सुरू झालेले आकडेवारीचे काम मंगळवारी पहाटेपर्यंत सुरू होते. मात्र, तरीही २३५ दूध संस्थांचे आदेश निर्गमित करण्याचे काम प्रलंबित राहिले आहे. त्यामुळे अंतिम चित्र स्पष्ट होण्यासाठी आणखी काही काळ प्रतीक्षा करावी लागणार आहे.

विशेष म्हणजे, तत्कालीन सहायक निबंधक सुजय कदम यांनी यापूर्वी पात्र ठरविलेल्या २६७ दूध संस्थांबाबतची सुनावणी सध्या मुंबई येथे सहनिबंधक प्रज्ञा तायडे यांच्यासमोर सुरू आहे. या सुनावणीचा अंतिम निकाल अद्याप लागलेला नसला तरी या संस्था सध्या पात्र मानण्यात आल्या आहेत. त्यामुळे त्यांना ठरावाचा मसुदा पाठविण्यात आला आहे. सुनावणीदरम्यान पात्र ठरणाऱ्या संस्थांचे ठराव ग्राह्य धरले जाणार असल्याचे सांगितले जात आहे.

दरम्यान, प्रलंबित असलेल्या २३५ दूध संस्थांपैकी केवळ ३० ते ३५ संस्था पात्र ठरण्याची शक्यता वर्तविण्यात येत आहे. त्यामुळे उर्वरित जवळपास २०० संस्था अपात्र ठरू शकतात. तसे झाल्यास अपात्र दूध संस्थांची एकूण संख्या सुमारे ६५० पर्यंत पोहोचण्याची शक्यता व्यक्त केली जात आहे. त्यामुळे गोकुळ निवडणुकीच्या समीकरणांवर याचा मोठा परिणाम होण्याची शक्यता आहे.

दुसरीकडे, दूध संस्थांकडून ठराव दाखल करण्याची प्रक्रिया सुरूच आहे. मंगळवारी दिवसभरात २२ दूध संस्थांनी आपले ठराव दाखल केले. यामध्ये राधानगरी आणि करवीर तालुक्यातील प्रत्येकी चार, गडहिंग्लज तालुक्यातील सात, चंदगड तालुक्यातील तीन तर शिरोळ, भुदरगड, आजरा आणि पन्हाळा तालुक्यातील प्रत्येकी एका संस्थेचा समावेश आहे. यामुळे आजअखेर सहायक निबंधक (दुग्ध) कार्यालयात दाखल झालेल्या ठरावांची संख्या १०६ वर पोहोचली आहे.

दरम्यान, गोकुळ संदर्भातील तक्रारींमुळे आणखी एक वाद निर्माण झाला आहे. तक्रारदार प्रकाश बेलवाडे यांनी गोकुळची बदनामी केल्याचा आरोप करत त्यांच्या विरोधात गुन्हा दाखल करण्याची मागणी दूध संस्था प्रतिनिधींनी गोकुळ प्रशासनाकडे केली आहे. मात्र, प्रशासनाकडून अद्याप कोणतीही कार्यवाही झालेली नसल्याने दूध संस्था प्रतिनिधींनी पुढील पाऊल उचलण्याचा निर्णय घेतला आहे. बुधवारी हे प्रतिनिधी पुणे येथे विभागीय उपनिबंधक राजकुमार पाटील यांची भेट घेणार असून प्रकाश बेलवाडे यांच्याविरोधात गुन्हा नोंद करण्याची मागणी त्यांच्याकडे करणार असल्याची माहिती समोर आली आहे.

गोकुळ निवडणुकीच्या पार्श्वभूमीवर पात्र आणि अपात्र संस्थांची अंतिम संख्या काय राहणार, तसेच प्रलंबित संस्थांबाबत कोणता निर्णय होणार याकडे जिल्ह्यातील दूध संस्था, प्रतिनिधी आणि संबंधित घटकांचे लक्ष लागून राहिले आहे. बुधवारी समोर येणारी अंतिम आकडेवारी निवडणुकीच्या पुढील राजकीय आणि संघटनात्मक घडामोडींसाठी महत्त्वाची ठरणार आहे.