Gold-Silver Purity | सोने-चांदी किती शुद्ध? आता तुमच्या मोबाईलद्वारेच ओळखा शुध्दता.. जाणून घ्या सविस्तर
Verify gold and silver purity instantly with BIS hallmark and mobile app.
Gold-Silver Purity: देशात सोने आणि चांदीच्या किमती सातत्याने वाढत असताना, या मौल्यवान धातूंची शुद्धता तपासणे ग्राहकांसाठी अत्यंत महत्त्वाचे झाले आहे. “चकाकते ते सोने नसते” ही म्हण अनेकदा खरी ठरते. शुद्धतेत थोडाही फरक पडला, तर थेट आर्थिक नुकसान होऊ शकते. मात्र आता खिशातील मोबाईलच तुमचा विश्वासू तपासनीस ठरणार आहे. सरकारी व्यवस्थेमुळे तुम्ही घरबसल्या, काही सेकंदांत सोने-चांदीची शुद्धता पडताळू शकता.
हॉलमार्किंग म्हणजे काय? Gold-Silver Purity
भारतामध्ये सोने आणि चांदीच्या दागिन्यांसाठी हॉलमार्किंग व्यवस्था लागू आहे. ही व्यवस्था Bureau of Indian Standards (BIS) यांच्या नियंत्रणाखाली आहे. हॉलमार्किंगचा मुख्य उद्देश ग्राहकांची फसवणूक रोखणे आणि दागिन्यांमधील शुद्ध धातूचे प्रमाण निश्चित करणे हा आहे. हॉलमार्क ही सरकारी हमी मानली जाते. दागिन्यावर असलेली मोहर त्या धातूची शुद्धता दर्शवते.
सप्टेंबर 2025 पासून प्रत्येक चांदीच्या दागिन्यावर BIS लोगो, ‘SILVER’ हा शब्द, शुद्धतेचा दर्जा (फायननेस) आणि एक युनिक HUID क्रमांक असणे बंधनकारक करण्यात आले आहे. त्यामुळे चांदीच्या खरेदीतही पारदर्शकता वाढली आहे.
सोन्याची शुद्धता: कॅरेट ग्रेड
भारतात सोन्याच्या दागिन्यांसाठी सहा कॅरेट ग्रेड मान्य आहेत. खालील तक्त्यात त्यांची माहिती दिली आहे:
| कॅरेट | फायननेस |
|---|---|
| 14K | 585 |
| 18K | 750 |
| 20K | 833 |
| 22K | 916 |
| 23K | 958 |
| 24KS | 995 |
22K (916) सोने दागिन्यांसाठी सर्वाधिक वापरले जाते, तर 24KS (995) हे अत्यंत शुद्ध मानले जाते.
चांदीच्या शुद्धतेचे ग्रेड
चांदीसाठी एकूण सात ग्रेड निश्चित करण्यात आले आहेत:
| ग्रेड |
|---|
| 800 |
| 835 |
| 925 |
| 958 |
| 970 |
| 990 |
| 999 |
यामध्ये 925 (स्टर्लिंग सिल्व्हर) हा दागिन्यांसाठी सर्वाधिक प्रचलित दर्जा आहे.
मोबाईलवरून Gold-Silver Purity कशी तपासाल?
BIS ने ग्राहकांसाठी BIS Care App उपलब्ध करून दिले आहे. हॉलमार्क असलेले सोने किंवा चांदी खरेदी करताना तीन गोष्टी नक्की तपासा—BIS लोगो, कॅरेट/फायननेस ग्रेड (उदा. 22K916) आणि 6 अंकी अल्फान्यूमेरिक HUID क्रमांक.
ॲपमध्ये ‘Verify HUID’ या पर्यायावर जाऊन HUID क्रमांक टाकल्यानंतर तुम्हाला संबंधित सराफाचे नाव, हॉलमार्किंग सेंटर, दागिन्याचा प्रकार आणि हॉलमार्किंगची तारीख अशी सविस्तर माहिती मिळते. यामुळे दागिना खरा आहे की नाही, याची खात्री सहज होते.
चांदीच्या बाबतीतही हाच नियम लागू आहे. दागिन्यावर असलेला HUID क्रमांक BIS Care ॲपमध्ये टाकून शुद्धतेची संपूर्ण माहिती तपासता येते. त्यामुळे वाढत्या किमतींच्या काळात ग्राहकांनी फसवणूक टाळण्यासाठी ही सोपी पण प्रभावी पद्धत नक्की वापरावी.