कुप्रसिद्ध टोळीच्या म्होरक्यासह जिल्ह्यातून 12 गुन्हेगार हद्दपार; कोल्हापूर पोलिसांची कारवाई | Kolhapur Crime News
कोल्हापूर | लाेकसभा निवडणुकीच्या अनुषंगाने पाेलिस आणि प्रशासन सतर्क झाले आहे. बेकायदेशिर काम करणाऱ्यांवर जरब बसावी यासाठी प्रशासन ठाेस निर्णय घेत आहे. त्यातूनच कोल्हापूर शहर आणि परिसरात मटका जुगार अड्डे चालवून कायदा व सुव्यवस्था बिघडवणारा मटका व्यवसायाचा मालक विजय पाटील याच्यासह टोळीतील बारा जणांवर कोल्हापूर पोलिसांनी कारवाईचा बडगा उगारला आहे.
विजय पाटील सह टोळीतील बारा जणांवर एक वर्षासाठी कोल्हापूर जिल्ह्यातून हद्दपारची कारवाई करण्यात आली आहे. जुना राजवाडा पोलिसांनी पोलीस अधीक्षक महेंद्र पंडित यांच्याकडे सादर केलेल्या प्रस्तावाची चौकशी पूर्ण झाल्यानंतर ही कारवाई केली आहे. या कारवाईनंतर अवैध व्यावसायिकांचे धाबे दणाणले आहेत.
हद्दपार झालेल्यांत विजय पाटीलसह राहुल बाळू गायकवाड (रा. यादवनगर, राजारामपुरी), अजित सर्जेराव इंगळे (टिंबर मार्केट), संदीप बाळासाहेब राऊत (संध्यामठ गल्ली, शिवाजीपेठ), प्रकाश नागनाथ गाडीवडर (क्रशर चौक, सानेगुरुजी वसाहत), दिलीप जगन्नाथ अधिकारी (संभाजीनगर, मोरे कॉलनी), आनंदा श्रीपती दुकांडे (वेताळमाळ तालमीजवळ, शिवाजी पेठ), चैतन्य विलास बंडगर (क्रशर चौक, झोपडपट्टी), विष्णू पांडुरंग आग्रे (रा. काटेभोगाव, ता. पन्हाळा), निरंजन वसंत ढोबळे (मंगळवार पेठ, कोल्हापूर), कुलदीप बाजीराव लांबोरे (मंगळवार पेठ), नंदकुमार पंडितराव चोडणकर (गंगावेश, कोल्हापूर) यांचा समावेश आहे.
निवडणूक आचारसंहितेच्या पार्श्वभूमीवर शांतता व सुव्यवस्था अबाधित ठेवण्यासाठी पोलिस अधीक्षक महेंद्र पंडित यांनी महाराष्ट्र पोलिस अधिनियम 1951 चे कलम 55 अन्वये ही कारवाई करून मोठा झटका दिला आहे. शहरासह इचलकरंजी, जयसिंगपूर, शिरोळ, कुरुंदवाड, वडगाव, शहापूर, शाहूवाडी, कागल, मुरगूड येथील स्वयंघोषित मटकाकिंग आणि बुकी रडारवर असल्याचे पोलिस अधीक्षक पंडित, स्थानिक गुन्हे अन्वेषणचे निरीक्षक रवींद्रकुमार कळमकर यांनी सांगितले.
काेल्हापूर पाेलिस यांच्याकडून बेकायदेशिर मद्य विक्री करणाऱ्यांवर देखील लक्ष ठेवले जात आहे. समाज माध्यमातील आक्षेर्पाह पाेस्ट देखील प्रशासन तपासत असून अशा पोस्ट पाेलिसांकडे तपासासाठी वर्ग केल्या जात आहेत. एकंदरीतच निवडणुकीला काेणतेही गालबाेट लागू नये यासाठी पाेलिस प्रयत्नशिल असल्याचे दिसत आहे.
