Kolhapur Crime : कर्जबाजारीपणामुळे दरोड्याचा बनाव! दागिन्यांसाठी पतीनेच केला पत्नीचा खून, आजऱ्यातील प्रकरणाचा 24 तासात उलगडा

कोल्हापूर | आजरा तालुक्यातील मडिलगे गावात दरोडेखोरानी एका महिलेचा खून केल्याची घटना (Kolhapur Crime) घडली होती. दरम्यान पोलीस तपासात या प्रकरणातील फिर्यादीच खूनी निघाल्याने सर्वत्र खळबळ उडाली आहे. प्रचंड कर्जबाजारी झालेल्या सुशांत पवार याने आपल्या पत्नीचा खून केल्याचे उघड झाल्याने त्यास पोलीसांनी ताब्यात घेतले आहे.

लोकांचे कर्ज फेडण्यासाठी सुशांतने आपली पत्नी पूजा हिच्याकडे दागिने मागितले होते. परंतु तिने दागिने देण्यास नकार दिल्याचा राग मनात धरून सुशांतने तिचा निर्घृण खून केला. विशेष म्हणजे, खून केल्यानंतर पोलिसांची दिशाभूल करण्यासाठी त्याने दरोड्याचा बनाव रचला. मात्र अवघ्या २४ तासांत पोलिसांनी गुन्हा उघडकीस आणत फिर्यादी आरोपीला अटक केली आहे.

पूजा सुशांत गुरव (रा. मडिलगे) असे खून झालेल्या महिलेचे नाव आहे. या प्रकरणात पोलिसांना तिचा पती, सुशांत सुरेश गुरव याच्यावर संशय निर्माण झाला होता. सुशांत गुरव याच्यावर खासगी सावकार आणि बँकांचे मोठे कर्ज होते. पैशांसाठी होणाऱ्या तगाद्यामुळे तो तणावात होता. त्यामुळे त्याने पत्नी पूजाकडे दागिन्यांची मागणी केली. मात्र तिने दागिने देण्यास नकार दिल्याने त्यांच्यात वाद झाला. या वादातूनच सुशांतने दरोड्याचा बनाव रचत पत्नीच्या अंगावरील दागिने चोरून तिचा खून केला.

सुशांतने पत्नी पूजाच्या डोक्यात फावडे व दगडाने वार करत तिचा खून केला. त्यानंतर पोलिसांकडे दरोडा पडल्याची खोटी तक्रार दाखल केली. तपासादरम्यान पोलिसांना सुशांतच्या जबाबांमध्ये विसंगती वाटू लागली. त्याला विचारलेल्या प्रश्नांना तो थातूरमातूर उत्तरे देत होता. त्यामुळे संशय वाढल्याने पोलिसांनी आपला पोलिसा खाक्या दाखवताच त्याने खूनाची कबुली दिली. पोलिसांकडून या प्रकरणाचा पुढील तपास सुरू आहे.